Kryeministri i Grenlandës, Jens-Frederik Nielsen, tha të hënën se presioni i SHBA-së për të marrë përsipër ishullin është “i papranueshëm” pasi Uashingtoni njoftoi një të dërguar të posaçëm në Grenlandë.
“Amerikanët e dinë se ne i mbështesim; ata e dinë se nuk ka asnjë pengesë që Shtetet e Bashkuara të rrisin sigurinë në Arktik në territorin e Grenlandës nëse dëshirojnë ta bëjnë këtë. Por kalimi nga kjo në presionin për të marrë përsipër një vend që është i populluar dhe ka sovranitetin e vet nuk është i pranueshëm”, tha Nielsen për Sermitsiaq.
Ai tha se SHBA-të po flasin me “dy zëra”, duke vënë në dukje se ndërsa ambasadori Ken Howery pranoi se Grenlanda nuk dëshiron të bashkohet me SHBA-në, Presidenti Donald Trump nuk e informoi Grenlandën për të dërguarin.
“Duhen të paktën dy zëra për të zhvilluar një bisedë, dhe kjo nuk ka ndodhur”, tha Nielsen, duke shtuar se aleatët duhet të jenë në gjendje t’i besojnë njëri-tjetrit, shkruan AA.
“Në asnjë moment nuk jemi kontaktuar nga Shtetet e Bashkuara në lidhje me planet për këtë të dërguar të posaçëm”, tha ai, duke shtuar se mësoi nga media se i dërguari do ta ndihmonte Trumpin “në përpjekjet e tij për të marrë kontrollin e vendit tonë”.
Trump shpalli Guvernatorin e Luizianës, Jeff Landry, si të dërguar të posaçëm, duke thënë se ai e njeh “sa thelbësore është Grenlanda” për sigurinë kombëtare të SHBA-së.
Grenlanda, një territor autonom nën sovranitetin danez, dhe Danimarka kanë hedhur poshtë çdo propozim për të shitur ishullin.
