Kryeministri britanik të mërkurën ka dënuar sulmet e vazhdueshme të Izraelit në Rripin e Gazës, duke thënë se ofensiva e fundit është “e tmerrshme, kundërproduktive dhe e patolerueshme”.
Duke folur në Dhomën e Komunave, Keir Starmer përsëriti kundërshtimin e Britanisë ndaj sulmeve të vazhdueshme të Izraelit në Gaza, si dhe dhunës së kolonëve në Bregun Perëndimor të pushtuar.
“Ne e kemi kundërshtuar fuqimisht zgjerimin e operacioneve ushtarake dhe dhunën e kolonëve, si dhe bllokimin e ndihmës humanitare.”
Ai shton se do të merren në konsideratë veprime të mëtejshme kundër Izraelit, përfshirë sanksionet, shkruan BBC.
Starmer vazhdon: “Ne duhet të rikthehemi në një armëpushim. Ne kemi nevojë që pengjet që janë mbajtur për një kohë shumë të gjatë të lirohen dhe ne kemi nevojë urgjente për më shumë ndihmë, shpejt dhe në sasi të mëdha, në Gaza, sepse është një situatë e tmerrshme dhe e patolerueshme.”
Edhe Ministri i Jashtëm i Mbretërisë së Bashkuar, Hamish Falconer, kritikoi ashpër qeverinë izraelite gjatë një deklarate në Dhomën e Komunave.
“Jemi të tronditur nga raportet e përsëritura për incidente me viktima masive, në të cilat palestinezë janë vrarë ndërsa përpiqen të hyjnë në vendet e ndihmës në Gaza”, thotë ai.
Falconer dënon rrjetin e ri të shpërndarjes së ndihmave të mbështetur nga Izraeli , duke thënë se është çnjerëzor, nxit dëshpërimin dhe rrezikon civilët.
