Kryetari i Kuvendit të Serbisë, Vladimir Orliq, vlerëson se protestat e djeshme në Prishtinë për shkak të marrëveshjes evropiane për normalizimin e marrëdhënieve ndërmjet Kosovës dhe Serbisë, janë tregues i rëndësisë së themelimit të Asociacionit të Komunave me shumicë serbe.
“Në bazë të atyre ngjarjeve të djeshme, por jo vetëm atyre, ne mund të kuptojmë më mirë rëndësinë e Asociacionit dhe çfarë lloj trazirash mund të shkaktojë një çështje e tillë në nivelin politik në Prishtinë“, tha Orliq për televizionin Happy, shkruan Beta, përcjell teve1.info.
Sipas tij, Kurti “ka rezistuar në të gjitha mënyrat e mundshme” për ta shmangur këtë obligim, ndërsa protestat në Prishtinë treguan se çfarë mendon skena politike lokale për Asociacionin.
“Dhe pastaj dikush këtu ju thotë se Asociacioni nuk është në interesin e serbëve, se nuk është diçka aq e rëndësishme, atje duan t’i vënë flakën Kurtit (për shkak të Asociacionit) i thonë që po shkojnë të hudhin koktej molotovi dhe kjo është përgjigja më e mirë, a është Asociacioni i rëndësishëm apo jo”, ka vlerësuar Orliq.
