Kompania Rajonale e Ujësjellësit “Prishtina” ka apeluar te qytetarët që të shfrytëzojnë ujin në mënyrë të kontrolluar, duke theksuar se kursimi i ujit është i domosdoshëm për të siguruar rezerva të mjaftueshme për të ardhmen.
Në një njoftim publik, kompania ka ngritur shqetësimin për rritjen e kërkesave për ujë të pijshëm, duke paralajmëruar se përdorimi i pakontrolluar po ndikon negativisht në zvogëlimin e rezervave.
“Uji sot nuk duhet të shfrytëzohet në mënyrë të pakontrolluar, me ç’rast i zvogëlojmë rezervat e ujit të pijshëm, por uji duhet kursyer pikë për pikë! Vetëm kështu sigurojmë sasi të mjaftueshme të ujit të pijshëm për të ardhmen”, thuhet në njoftim.
Kompania bën të ditur se shpërndarja e ujit po bëhet në mënyrë të barabartë dhe me kapacitete maksimale trajtuese, por përballen me konsum të lartë, sidomos gjatë muajve të verës.
Po ashtu, “Ujësjellësi Prishtina” ka njoftuar se është duke monitoruar situatën në terren, me qëllim të identifikimit të rasteve të keqpërdorimeve dhe kyçjeve ilegale në zona urbane dhe rurale.
“Nga ju kërkojmë shpenzim racional të ujit, ndërsa ne jemi duke inspektuar terrenin për kyçje ilegale dhe keqpërdorime të ujit në zonat urbane e rurale”, thuhet në fund të njoftimit.
