Kompania Rajonale e Ujësjellësit “Prishtina” ka njoftuar konsumatorët që të kenë kujdes nga mesazhet e dyshimta që mund të pranojnë nga numri telefonik +639605610623, duke theksuar se ky numër nuk ka asnjë lidhje me kompaninë.
Përmes një njoftimi publik në Facebook, KRU “Prishtina” u ka bërë thirrje qytetarëve që të injorojnë mesazhet e dërguara nga ky numër dhe të mos u përgjigjen atyre, pasi dyshohet se bëhet fjalë për një tentativë mashtrimi.
“Kjo linjë telefonike nuk i përket KRU ‘Prishtina’ dhe mesazhet e dërguara prej saj nuk janë komunikime zyrtare të kompanisë sonë”, thuhet në njoftim.
Kompania ka apeluar që konsumatorët të mos ndajnë të dhëna personale, informata bankare apo informacione të tjera të ndjeshme përmes mesazheve të tilla.
Po ashtu, KRU “Prishtina” ka rikujtuar se çdo informacion zyrtar publikohet vetëm përmes kanaleve të saj zyrtare të komunikimit./teve1.info/
