Kompania Rajonale e Ujësjellësit “Hidromorava” dhe Ministria e Ekonomisë kanë nënshkruar sot një marrëveshje mirëkuptimi rreth një projekti për ndërtimin e impiantit të ujërave të zeza dhe për të rehabilituar kanalizimin në rajonin e Gjilanit.
Sipas njoftimit të Ministrisë së Ekonomisë, nga ky projekt, KRU “Hidromorava” do të përfitojë grant 11 milionë euro, i cili financohet nga Banka Evropiane për Investime, përcjell teve1.info
“Projekti do t’u shërbejë 110 mijë banorëve të qytetit të Gjilanit dhe viseve përreth, duke mbrojtur mjedisin, burimet ujore dhe shëndetin publik. Investimi i planifikuar do të ulë dukshëm sasinë e ujërave të zeza që derdhen drejtpërdrejt në lumenjtë e rajonit. KRU “Hidromorava” është një nga shtatë ndërmarrjet rajonale të ujësjellësit dhe kanalizimit, në pronësi të Republikës së Kosovës. Ajo ka mbyllur vitin 2022 me bilanc pozitiv”, bëhet e ditur në njoftim.
Kjo marrëveshje u nënshkrua nga zëvendësministri i Ekonomisë, Geotar Mjeku dhe kryeshefi ekzekutiv i KRU “Hidromorava”, Ymer Salihu. /Teve1.info/
