Pas rrebeshit të mbrëmjes, të përcjellë me shi dhe breshër në rajonin e rrafshit të Dukagjinit, KRU “Hidrodrini” ka ngritur shkallën e Emergjencës dhe gatishmërisë, përcjell teve1.info
Sipas njoftimit, bëhet e ditur se janë udhëzuar të gjithë Menaxherët e Njësive Operative te zonës së mbulueshmërisë në komunat Pejë, Klinë, Istog, Deçan e Junik që të përcjellin gjendjen në burime, sistem dhe furnizim.
“Deri më tash konstatohet se të gjitha burimet janë në normë dhe standard! Poashtu, në rast të paraqitjes së nevojës, Kryeshefi Cena, ka ofruar mbështetjen me makineri të rëndë për autoritetet komunale të komunave respektive. Ekipet mobile mbeten në terren!”, bëhet e ditur në njoftim.
Moti me shi dhe breshër ka shkaktuar vërshime të shumta në qytetin e Pejës.
Drejtori për Mbrojtje dhe Shpëtim në këtë komunë, Gëzim Gashi ka thënë për teve1.info se gjendja momentale nuk është e mirë.
Ai tha se deri më tani nuk ka persona të lënduar, por dëme të konsiderueshme materiale.
“Në teren jemi, gjendja momentalisht nuk është e mirë. Qendra e qytetit është në gjendje jo të mirë, është vërshuar pothuajse e gjitha. Lumbardhi nuk ka dale nga shtrati, mirëpo një kanal që vjen nga bjeshkët ka ndikuar në këto vërshime. Dëme në njerëz nuk ka, por dëme materiale ka të konsiderueshme”, ka deklaruar ai. /Teve1.info/
Situatë e rëndë në Pejë, shiu e breshëri shkaktojnë vërshime të mëdha
