Kroacia ka lënë të hapur mundësinë për rritjen e numrit të ushtarëve të saj në misionin paqeruajtës të NATO-s në Kosovë, KFOR në kohën kur Shtetet e Bashkuara të Amerikës po planifikojnë një reduktim të pranisë së tyre ushtarake në Evropë.
Ministri kroat i Mbrojtjes, Ivan Anushiq, deklaroi në Bruksel se vendet evropiane duhet të marrin më shumë përgjegjësi për sigurinë në kontinent, duke kompensuar pjesërisht zvogëlimin e pranisë amerikane.
Komentet e tij vijnë pasi komandanti suprem i NATO-s për Evropën, gjenerali amerikan Alexus G. Grynkewich, bëri të ditur se po shqyrtohet reduktimi i numrit të trupave në KFOR. Ndërkohë, Sekretari i Përgjithshëm i NATO-s, Mark Rutte, ka sqaruar se numri i pjesëtarëve të misionit në Kosovë mund të kthehet në nivelin e para vitit 2023, nga rreth 4.700 ushtarë aktualisht në afërsisht 3.000 deri në 3.500.
Anushiq tha se Kroacia e mbështet kërkesën e ShBA-së që aleatët evropianë të kontribuojnë më shumë në mbrojtjen dhe sigurinë rajonale.
“Amerikanët nuk do ta braktisin Evropën, por një pjesë e forcave të tyre do të tërhiqet. Ne duhet ta plotësojmë atë boshllëk me forcat tona. Për Kroacinë, prioritet mbetet KFOR-i dhe misioni në Kosovë”, deklaroi ai.
Sipas ministrit kroat, Evropa është paralajmëruar prej kohësh për nevojën që të marrë një rol më aktiv në fushën e sigurisë, ndërsa SHBA-ja po e zhvendos fokusin e saj strategjik në rajone të tjera.
Aktualisht, Kroacia ka 152 ushtarë të angazhuar në KFOR. Sipas vendimit të Parlamentit kroat për vitin 2026, ky numër mund të rritet deri në 200 pjesëtarë, gjë që e bën të mundur zgjerimin e kontingjentit kroat nëse merret një vendim i tillë politik.
Burime jozyrtare nga Ministria kroate e Mbrojtjes kanë bërë të ditur se Zagrebi është i fokusuar pikërisht te misioni në Kosovë, në kuadër të përpjekjeve të aleatëve evropianë për të marrë një barrë më të madhe në ruajtjen e sigurisë rajonale.
