Të parët në sallë erdhën familjarët e Marigona Osmanit.
Në gjykatore për të marrë verdiktin e Gjykatës Themelore në Ferizaj për herë të dytë, njëri pas tjetrit hynë Dardan Krivaqa e Arbër Sejdiu.
Për dy të akuzuarit për vrasjen e 18 vjeçares, edhe pas rigjykimit, u shpall vendimi i njëjtë.
“E gjykon me dënim me burgim të përjetshëm, në të cilin dënim do t’i llogaritet edhe koha e kaluar në paraburgim nga data 24.08.2021 e tutje. Të akuzuarin, Arbër Sejdiu, për veprën penale “ndihmë në kryerjen e veprës penale vrasje e rëndë”, e gjykon me dënim burgimi në kohëzgjatje prej 15 vitesh”, tha kryetari i trupit gjykues, Sahit Krasniqi.
Në arsyetimin e vendimit, u tha se mënyra në të cilin ishte kryer vrasja dhe ndihma e dhënë në kryerjen e vrasjes, është mizori e pakontestueshme.
“Në bazë të lëndimeve të cilat i ka pësuar e ndjera, eksperti mjekoligjor ka deklaruar se ajo ka pasur dhimbje posaçërisht të rënda dhe dhimbje të rënda. Andaj trupi gjykues vlerëson se në këtë rast mizoria është e pakontestueshme”, tha Krasniqi.
Megjithatë 15 vite burgim për Sejdiun, nuk janë të mjaftueshme për familjen Osmani.
“Pjesërisht i kënaqur. Përsëritje e vendimit të kaluar. Do të isha tërësisht i kënaqur nëse edhe i akuzuari i dytë do të merrte vendimin meritor, burgimin e përjetshëm, për ato që jena thirr prej fillimit”, tha avokati i familjes Osmani, Gazmend Rexhepi.
E avokatja e Sejdiut, paralajmëroi ankesë për këtë vendim.
“Po shpresoj që Gjykata të paktën ta jap një arsyetim se mbi cilat prova e ka bazuar këtë rikualifikim. Patjetër që do të paraqesim ankesë në afatin e lënë ligjor”, tha avokatija e Sejdiut, Arbnore Shefkiu.
Krivaqa dhe Sejdiu u liruan nga akuza për “dhunim” dhe “ndihmë në kryerjen e veprës penale dhunimi”.
Marigona Osmani, u vra në gusht të vitit 2021, në banesën e Krivaqës, ku ai së bashku me Sejdiun e kishin dërguar më pas në Spitalin e Ferizajt, pa shenja jete.
