Figura të opozitës ruse kanë reaguar me zemërim dhe zhgënjim ndaj një vendimi të Bashkimit Evropian për të ndaluar vizat me shumë hyrje në zonën Shengen për qytetarët rusë, i njoftuar ditët e fundit.
“Nisja e një lufte dhe pritja për të lëvizur lirisht në Evropë është e vështirë për t’u justifikuar”, tha shefja e politikës së jashtme të BE-së, Kaja Kallas, kur njoftoi vendimin të premten e kaluar.
Ajo shtoi se rregullat e shtrënguara ishin një përgjigje ndaj ndërhyrjeve me dronë rusë në hapësirën ajrore evropiane dhe sulmeve sabotuese të lidhura me Rusinë, ciiton Guardian.
Megjithatë, shumë në opozitën ruse thanë se ky veprim do të ishte kundërproduktiv. “Nuk mund ta fajësosh një vend të tërë për veprimet e qeverisë së tij”, tha në një intervistë telefonike Ilya Yashin, një politikan rus i opozitës i cili u burgos në fund të vitit 2022 për kundërshtimin e luftës në Ukrainë.
Yashin u lirua në një shkëmbim të burgosurish vitin e kaluar dhe tani jeton në Gjermani.
Yashin tha se vendimi për vizat ishte pjesë e një trendi për të synuar rusët e zakonshëm në perëndim me kufizime, ndërsa anëtarët e elitës së Putinit “gjithmonë do të gjenin boshllëqe nëse do të kishin nevojë”.
Vizat Shengen ishin tashmë të vështira për t’u marrë për rusët, dhe disa vende të BE-së, si Polonia dhe Finlanda, ua kanë ndaluar hyrjen të gjithë shtetasve rusë që nuk kanë leje qëndrimi.
Përveç kësaj, shumë rusë të mërguar kanë gjetur llogaritë e tyre bankare evropiane të mbyllura ose të ngrira në muajt e fundit.
“Ka shumë rusë kundër luftës dhe njerëz që duan të shohin ndryshime në Rusi. Do të ishte më e arsyeshme të ishim aleatë me këta njerëz dhe të bashkonim forcat me ta për të krijuar një front të përbashkët kundër Putinit”, tha Yashin.
