Me katër sportistë, Shqipëria ia ka dalë të sigurojë dy medalje bronzi në Kampionatin Evropian të Peshëngritjes, që po mbahet në Moldavi. Ka qenë Kristi Ramadani që ka fituar dy medaljet e bronzta, duke bërë që ekipi shqiptar të kthehet me sukses nga kjo ngjarje e madhe.
Në peshën deri në 81 kilogramë, Ramadani siguroi medaljet në stilin e shtytjes dhe në dygarësh. Nga gjashtë prova në total, Ramadani ia doli të mbyllte vetëm dy dhe të siguronte medaljet me 337 kilogramë të ngritura në total.
Në stilin e shkëputjes Ramadani ngriti 151 kg për vendin e shtatë, por përmirësoi gjithçka në shtytje, në stilin e preferuar të tij, duke ngritur 186 kg.
Kristi Ramadani vitin e kaluar në Sofje u shpall nënkampion i Evropës me dy medalje argjendi në shtytje dhe dygarësh.
