Krimet ekonomike kanë kryer sot një aksion në Prishtinë, me ç’rast në një subjekt biznesor është sekuestruar sasi e mallit të dyshuar pa origjinë të prejardhjes dhe e falsifikuar.
Sipas njoftimit të Policisë së Kosovës, biznesi bën shitjen e produkteve të ndryshme me shumicë si suplemente të ndryshme, shampona, mjaltë për përdorime të ndryshme për potencë.
Bëhet e ditur se gjatë kontrollit të subjektit biznesor, është hasur sasi e konsiderueshme e mallrave për të cilat pronari nuk ka mundur të prezantoj dokumentet e origjinës së këtij malli.
“Sot me datë 05.12.2023 hetuesit nga Sektori për Hetimin e Krimeve Ekonomike në bashkëveprim me Inspektoratin e Tregut nga Ministria e Industrisë Ndërmarrësisë dhe Tregtisë, kanë ndërmarr veprime në teren lidhur me informatën e lartcekur. Gjatë këtij operacioni është kryer kontroll në subjektin biznesor të dyshuar në tri (3) lokacione në Prishtinë. Gjatë kontrollimit të subjektit biznesor është hasur sasi e konsiderueshme e mallrave për të cilat pronari nuk ka mundur të prezantoj dokumentet e origjinës së këtij malli. Lidhur me këtë është njoftuar Dogana e Kosovës-Njësia e Antikontrabandës të cilët kanë dal në vendin e ngjarjes duke u bashkuar në operacion me hetuesit e PK-së dhe Inspektoratin e MINT. Në këtë rast Dogana e Kosovës ka sekuestruar sasi të konsiderueshme të mallrave, të dyshuara si të kontrabanduara, ndërsa Inspektorati i tregut ka bërë bllombimin e depos deri në përfundim të rastit nga Dogana e Kosovës. Operacioni është në proces nga Policia e Kosovës, Dogana e Kosovës, Inspektorët sanitarë dhe zyrtarët tjerë të përfshirë në rast lidhur me kontrollimin e këtij subjekti biznesor”, thuhet në njoftim.
PK-ja njofton se i dyshuari G.T. është dërguar për invervistim, i dyshuar për veprat penale “Kontrabandim i mallrave” dhe “Shmangia nga pagesa e tarifave të detyrueshme doganore ose tarifave akcizore”.
Lidhur me këtë rast është njoftuar Prokurori kompetent dhe me rekomandimin e tij, personi i dyshuar është liruar në procedurë të rregullt.
