Kështu ka bërë të ditur kryetari i Sindikatës së PK-së, Imer Zeqiri gjatë një interviste në emisionin “Ditari” në Tëvë 1.
Ai thotë se përgjatë të gjitha qeverisjeve të kaluara, premtimet për realizimin e këtyre kërkesave kanë mbetur vetëm në letër.
“Mirëpo 23 vite pas themelimit Policia e Kosovës është e vetmja që nuk ka sigurim shëndetësor në botë. Nuk e di a ka shtet tjetër që ka polici apo institucione të sigurisë që ska sigurim. Në realitet të gjitha ato që i kanë thënë udhëheqësitë e shtetit janë të vërteta dhe vërtet duhet krenuar me PK-në, por realisht ku jemi? Pa sigurim shëndetësor, pa një ligj për pensionim që zyrtari policor del pa pension gjatë përfundimit të karrierës pa një listë të pagave që tanimë është në diskutim dhe pritet të finalizohet por ka vend për korrigjim”, tha ai.
Madje, Zeqiri përmendi me shifra edhe numrin e zyrtarëve policorë të lënduar gjatë kryerjes së detyrës zyrtare, por edhe ata që kanë sëmundje kronike.
“Kemi 300 zyrtarë që kanë humbur jetën në punë gjatë kryerjes së punës vdekja i ka zënë në punë, 420 zyrtarë të lënduar gjatë detyrës, 237 zyrtarë që janë sëmurë gjatë detyrës dhe kemi mbi 527 zyrtarë me sëmundje kronike…I vetmi institucion që gjatë kryerjes së detyës zyrtare rrezikon jetën e vet për të mbrojtë jetën e të tjerëve pa një sigurim shëndetësor definitivisht është shumë e pakuptimtë, e paarsyeshme mendoj që asnjë njeri që mendon me logjikë me të shëndoshë nuk kishte prit”, tha ai.
Sipas tij, në kërkesën e tyre për sigurim shëndetësor që kap shifrën e rreth 15 milionë eurove – nuk është e papërballueshme për Qeverinë e Kosovës.
“Dhe kërkesë e Sindikatës është që sa më shpejtë, në një kohë optimale ta bënë me sigurim shëndetësor një shumë që kemi kërkuar te ministri i Punëve të Brendshme nuk është e papërballueshme për fondin e Qeverisë 15 milionë euro të bësh sigurimin e të gjithë zyrtarëve… Përveç se do të ishte nder dhe respekt, do të ishte edhe për Qeverinë që pas 23 viteve deri më tash nuk e ka bërë askush ta bëjë kjo Qeveri”, shtoi ai./teve1.info./
