Kreshnik Smajlaj është zgjedhur kryetar i degës së Aleancës për Ardhmërinë e Kosovës (AAK) në Prishtinë, në Kuvendin Zgjedhor të kësaj partie.
Lajmi është bërë i ditur nga Ramush Haradinaj, i cili ka vlerësuar procesin zgjedhor dhe mobilizimin e strukturave të partisë në kryeqytet.
Haradinaj ka theksuar rëndësinë e Prishtinës për partinë që drejton, duke e cilësuar atë si qendër kyçe ku, sipas tij, matet vizioni për zhvillimin e vendit dhe energjia e ndryshimit.
“Sot, në Kuvendin Zgjedhor të Aleancës në Prishtinë, ishte kënaqësi që bashkë me kryetarin Ardian Gjini të shohim mobilizimin dhe energjinë e strukturave tona. Urime Kreshnik Smajlajt për zgjedhjen Kryetar i Degës së Aleancës në Prishtinë”, ka thënë Haradinaj.
Ai ka shtuar se Smajlaj përfaqëson një gjeneratë të re politike, duke e vlerësuar si të angazhuar dhe sipërmarrës të suksesshëm.
Po ashtu, Haradinaj ka falënderuar kryetarin e deritanishëm të degës, Brahim Mehmetaj, për kontributin e tij në udhëheqjen e AAK-së në Prishtinë dhe shërbimin ndaj qytetarëve.
Sipas Haradinajt, AAK po hyn në një fazë të re të fuqizimit organizativ, në prag të zgjedhjeve të brendshme dhe zgjedhjeve të 7 qershorit.
