Ish-presidenti, Hashim Thaçi, ka arritur në Kosovë me një leje të përkohshme nga Gjykata Speciale në Hagë për të vizituar babin e tij të sëmurë i cili është i shtrirë në Klinikën Interne në QKUK.
Gazetari i Tëvë1, Lindrit Zejnullahu ka thënë se në oborrin e QKUK janë duke qëndruar një numër i qytetarëve dhe bashkëluftëtarë të ish-presidentit të cilët kanë ardh për ta parë nga afër.
“Janë bërë afër dy orë që kur ish-presidenti Hashim Thaci ka ardhur në Klinikën Interne ku po viziton babain e tij të sëmurë. Jashtë në oborrin e QKUK-së janë shumë qytetarë dhe bashkëluftëtarë të ish-presidentit të cilët kanë ardhur për ta parë për së afërmi. Prezentë janë edhe shumë vetura të EULEX dhe pjesëtarë të Policisë së Kosovës të cilët janë duke asistuar në këtë vizitë”, ka deklaruar Zejnullahu.
Ndryshe, zëdhënësi i Dhomave të Specializuara Michael Doyle, tha për Tëvë1 se vizita u lejua për arsye humanitare.
“Po mund ta konfirmoj. Për arsye detyruese humanitare, Trupi Gjykues dhe gjyqtari i procedurës paraprake kanë udhëzuar Sekretarin që të menaxhojë një vizitë paraburgimi në Kosovë për Hashim Thaçin që të jetë me babain e tij. I akuzuari mbetet në paraburgim dhe në paraburgim nga Dhomat e Specializuara”, thuhet në përgjigjen e tij.
Thaçi ndodhet në Qendrën e Paraburgimit në Hagë që nga nëntori i vitit 2020.
