Mëngjesi i së premtes ishte i trishtë për punëtorët e kompanisë “Koslabor”.
Një zjarr i madh shpërtheu në këtë objekt i cili gjendet në magjistralen Prishtinë-Ferizaj.
E beteja e zjarrfikësve për ta fikur ishte e vështirë.
E gjithë situata po mbikëqyrej nga Policia e Kosovës.
Ata deklaruan se nga ky zjarr që kaploi kompaninë e cila shiste pajisje farmaceutike, nuk pati të lënduar.
“Sot rreth orës 10:00, kemi pranuar informatën për një incident zjarri në një objekt në rrugën Prishtinë-Ferizaj. Në vendngjarje janë zjarrfikësit dhe policia të cilët po merren me rastin. Bazuar në të dhënat e deritanishme janë shkaktuar vetëm dëme mater”, tha Ahmeti.
Zjarrfikësit bënë çmos që zjarri të mos përfshinte edhe objektet për rreth.
“Menjëherë ekipet kanë dalë në vend të ngjarjes. Por, fatkeqësisht siç e shihni kjo është depo me pajisje mjekësore dhe sigurisht që ka edhe pajisje mjekësore për të cilat ne nuk e dimë çfarë lënde është (…) Kur ka ardhur ekipi në vend të ngjarjes zjarri ka qenë në një fazë të zhvillimit tepër të lartë të zjarrit dhe gjasat kanë qenë të vogla për me arrit me parandaluar zjarrin. Dëmet janë evidente, ato nuk mund t’i sanojmë ne si zjarrfikës”, tha komandanti i zjarrfikësve, Malë Gashi.
Gashi, bëri të ditur se kompania nuk kishte masa mbrojtëse nga zjarri.
“Vlen të ceket që gjithë këto investime që po bëhen në këto lloje të objekteve, të depove siç e kemi pasur rastin edhe te Parku i Biznesit në Drenas, fare nuk ka masa mbrojtëse nga zjarri. Ju bëj apel të gjitha bizneseve që po investojnë me mijëra euro në materiale çfarë do qofshin ato, të marrin masa ashtu siç rekomandohet me ligje e rregullore”, shtoi ai.
Objekti që u përfshi nga zjarri i është dhënë me qira kompanisë “Koslabor”.
Vëllau i pronarit të objektit, tha se dëmet janë milionëshe, derisa dyshojnë që rryma ishte shkaktare e kësaj fatkeqësie.
“Nuk është duke u ditur ende prej çka është shkaktuar, por qiramarrësit po thonë prej rrymës. Sa i përket materialit që është aty nuk di çka t’ju them, ajo është një shumë e madhe sepse ka qenë i stërngarkuar. Ka pas mjete medicinave. Në orën 9:30 e kemi kuptuar që po digjet objekti. Njerëz brenda ka pas, por kanë dalë, fati që e kanë pa, për tjerat, s’di. Objekti është me qira, qiradhënësi jeton në Gjermani”, tha Shefki Morina.
Në muajin e kaluar edhe një fabrikë për përpunimin e plastikës në Parkun e Biznesit në Drenas ishte përfshirë nga zjarri.
