Kryetari i Partisë Demokratike të Kosovës, Memli Krasniqi ka qëndruar në Novosellë të Pejës, ku ka kërkuar mobilizim në mbështetje të kandidates së PDK-së për kryetare të Komunës së Pejës, Arta Vokshi Nallbani.
Krasniqi ka theksuar se kandidatura e Vokshi Nallbanit është një mesazh se politika në Kosovë ka nevojë për të ndryshuar vërtetë, duke thënë se ata do të jenë në balotazh më 12 tetor.
“Jam i bindur edhe nga përvoja, të cilën e kemi bashkërisht që sa më shumë që ka gra në lidership, në vendimmarrje, sa më shumë që ka të rinj e të reja në udhëheqësi edhe politika bëhet ma e mirë. Gara vetëm sa ka filluar dhe me 12 tetor do të jemi bashkë në balotazh për të fituar me datën 9 nëntor”, ka thënë Krasniqi, thuhet në komuniatën e PDK-së.
Ndërkaq, kandidatja e PDK-së për kryetare të Komunës së Pejës, Arta Vokshi Nallbani ka thënë se demokracia e vërtetë arrihet vetëm atëherë kur udhëheqësit e komunës qeverisin bashkë me qytetarët dhe për qytetarët.
“Andaj, ju ftoj të besoni në mua, të besoni në kandidatët tanë për asamble komunale, besoni në PDK-në dhe me 12 tetor të tregojmë që Peja mundet ma mirë, po mundet ma mirë vetëm me PDK-në”, është shprehur ajo.
