Kryetari i Partisë Demokratike të Kosovës, Memli Krasniqi ka thënë se takimi i 27 shkurtit në Bruksel, është takim për Asociacionin e jo për njohje.
Krasniqi ka thënë se takimi i së hënës do të shënojë fillimin e një faze të re të dialogut, në të cilët njohja reciproke nuk do të jetë më temë diskutimi.
Ai përmes një postimi në Facebook, ka thënë se Qeveria e Kosovës ka pranuar planin franko-gjerman nga i cili sipas tij, Kosova nuk përfiton asgjë.
“Pavarësisht nga takimi i së hënës, qeveria, tashmë publikisht, e ka pranuar planin e propozuar nga Bashkimi Evropian. Mirëpo, nga ajo që është parë deri tash, plani në vetvete nuk përmban pothuajse asnjë përfitim konkret për Kosovën. Aty nuk flitet për njohjen nga pesë vendet mos-njohëse të BE, nuk flitet për hapjen e rrugës drejt anëtarësimit në NATO, as për marrjen e statusit kandidat për anëtarësim në BE, ndërsa njohja e ndërsjellë është jashtë çdo diskutimi. Për më keq, nga deklaratat publike të zyrtarëve ndërkombëtarë, shihet qartë se fokusi nuk është në arritjen e objektivave të lartëcekura, por është në formimin e Asociacionit të komunave me shumicë serbe. Pra, takimi i së hënës është takim për Asociacionin e jo për njohje. Sepse, qeveria, me paaftësinë e saj, e ka degraduar dialogun nga arritja e qëllimit të marrëveshjes finale me njohje në qendër, në marrëveshje kalimtare me Asociacionin në qendër”, ka shkruar Krasniqi, raporton teve1.info.
Të hënën në Bruksel do të zhvillohet takimi ndërmjet kryeministrit Kurti dhe presidentit serb, Aleksander Vuçiq.
Sipas agjendës që ka publikuar BE, Borrell e Lajçak do të kenë takime ndaras me Kurtit e Vuçiqin e më pa do të zhvillohet edhe një takim i përbashkët./teve1.info/
