Anëtari i Këshillit Prokurorial të Kosovës (KPK), Visar Krasniqi, ka reaguar ndaj votimit për shkarkimin e Besim Kelmendit nga pozita e ushtruesit të detyrës së Kryeprokurorit të Shtetit, duke e cilësuar këtë proces si një përpjekje të organizuar për marrje të paligjshme të kontrollit mbi Prokurorinë e Shtetit.
Sipas tij, propozimi për shkarkimin e Kelmendit “bazohet në energjinë e qartë të një puçi institucional” dhe përbën tentativë për vendimmarrje të jashtëligjshme brenda sistemit prokurorial.
Krasniqi tha se sipas informacioneve të paraqitura edhe gjatë takimit të KPK-së, prapa këtij veprimi qëndron kryeprokurori i Prokurorisë Speciale, Blerim Isufaj.
“U tha qartë në mbledhje — mbrapa gjithë këtij planifikimi dhe organizimi qëndron zoti Isufaj”, deklaroi ai.
Ai theksoi se largimi i pesë anëtarëve nga mbledhja e KPK-së nuk ishte bojkot, por një veprim i domosdoshëm për të parandaluar miratimin e një vendimi të paligjshëm, i cili sipas tij do t’i shkaktonte dëm të rëndë sistemit prokurorial.
Gjatë konferencës për media, Krasniqi tha se situata ka marrë përmasa serioze dhe kërkoi nga Agjencia Kosovare e Inteligjencës të vlerësojë sigurinë juridike në vend.
Ai gjithashtu kërkoi që Policia e Kosovës të garantojë sigurinë e anëtarëve të pranishëm në konferencë.
“Kjo situatë dëshmon se largimi i pesë anëtarëve nuk ka qenë bojkot apo sabotim, por një ndërhyrje e domosodoshme për të mbrojtur ligjin dhe për të parandaluar një vendim të paligjshëm i cili do t’i shkaktonte dëm serioz sistemit prokurorial”, tha ai.
