Partia Demokratike e Kosovës ka reaguar pas shqetësimeve të ngritura nga komisionerët e saj në Mitrovicë lidhur me integritetin e procesit zgjedhor.
Kryetari i saj, Memli Krasniqi, ka bërë të ditur se partia ka ndërmarrë të gjithë hapat e nevojshëm për të mbrojtur vullnetin e qytetarëve.
“Prej mbrëmë, menjëherë pas njoftimit nga komisionerët tanë në Mitrovicë për shqetësimet rreth integritetit të procesit zgjedhor atje, kemi ndërmarrë të gjithë hapat e nevojshëm për mbrojtjen e vullnetit të qytetarëve. Shqetësimet e paraqitura janë serioze dhe, si të tilla, po i adresojmë në të gjitha instancat dhe adresat përkatëse”, ka deklaruar Krasniqi në një postim në Facebook.
Ai njoftoi se gjatë ditës së sotme, PDK do të dorëzojë ankesën zyrtare në Panelin Zgjedhor për Ankesa dhe Parashtresa (PZAP), brenda afatit ligjor.
Po ashtu, në orën 12:00, partia do të mbajë një konferencë për media ku do të paraqiten detajet dhe veprimet lidhur me këtë çështje.
Krasniqi ka theksuar se çdo votë përfaqëson zërin e qytetarit dhe themelin e demokracisë, prandaj procesi duhet të jetë transparent dhe i drejtë.
“Pa paragjykuar rezultatin përfundimtar, PDK kërkon që çdo procedurë të trajtohet me transparencë, drejtësi dhe në përputhje me ligjin, në mënyrë që besimi i qytetarëve në procesin zgjedhor të mbetet i plotë. Vota është e shenjtë në demokraci dhe PDK është e vendosur ta mbrojë integritetin e zgjedhjeve dhe vullnetin e vërtetë të votuesve me përgjegjësi, qetësi dhe bindjen e plotë se e vërteta do të dalë në dritë”, ka theksuar ai. /teve1.info/
