Kryetari i Partisë Demokratike të Kosovës (PDK), Memli Krasniqi, thotë se Qeveria Kurti është më e dobëta dhe paafta në Kosovë.
Sipas tij, nën qeverisjen e Albin Kurtit ka degraduar arsimi, shëndetësia dhe ka stagnuar zhvillimi ekonomik.
Lideri opozitar kritikon Kurtin që nuk ka hartuar një draft-statut të asociacionit, derisa i kërkon të merr një vendim për draftin e propozuar nga euro-amerikanët, të cilin e quan jashtëzakonisht të dëmshëm për Kosovën.
“Qeveria e Albin Kurtit do të mbahet mend si qeveria më e dobët në Kosovën e pavarur, si qeveria më e paaftë, si qeveria më jo efikase në cilëndo prej fushave. Në asnjë fushë ne nuk jemi më mirë sesa kemi qenë para tri apo pesë vjetësh”, tha Krasniqi.
Kryetari i PDK-së, thekson se Kurtit i është minimizuar hapësira për taktika sa i përket asociacionit, andaj në muajt e parë të vitit 2024 duhet të merr vendim ta pranojë ose të refuzojë draftin e propozuar nga euro-amerikanët.
“Hapësira për taktika i është minimizuar totalisht kryeministrit dhe ai duhet të merr një vendim një herë në jetën e tij për këtë çështje. Të jetë i qartë, e pranoi ose e refuzoi, pasi nuk mund ta shtyjë gjatë me këtë paqartësi dhe manipulim sikur deri tash”, tha Krasniqi.
Ai konsideron se drafti i asociacionit krijon një nivel të ri të pushtetit në Kosovë, pasi ka kompetenca të qarta ekzekutive, shkruan KP.
Shpërfaqjen e dallimeve ndërmjet Albin Kurtit dhe Vjosa Osmanit, Krasniqi i sheh më shumë si taktika politike, teksa thotë se presidentja s’ka rol aktiv në dialog.
Sipas tij, asociacioni dhe dialogu është barrë e rëndë për kryeministrin Kurti, andaj zgjedhjet e parakohshme janë në horizont gjatë vitit 2024.
Në anën tjetër, ai deklaron se gjithmonë ekziston potenciali për cenim të sigurisë në veri, por paralajmërimet për luftë frontale për një konflikt të gjatë dhe të armatosur janë vetëm një fryrje e zjarrit nga Kurti për të shmangur vëmendjen reale nga problemet e brendshme të Kosovës.
