Madje me themelimin e këtij Komisioni ai u shpreh se në Kuvendin e Kosovës “triumfoi demokracia” dhe u ruajt kushtetueshmëria dhe e drejta themelore e opozitës.
Sipas tij, përmes Komisionit Hetimor do të zbardhet çdo fakt dhe do t’i jepet përgjigje secilës pyetje për secilin vendim që Qeveria ka marrë muajt e fundit lidhur me menaxhimin e krizës energjetike në vend.
“Sot, në Kuvendin e Kosovës triumfoi demokracia! U ruajt kushtetutshmëria dhe e drejta themelore e opozitës për hetim parlamentar e mbikqyrje të punës së Qeverisë. Përmes themelimit të Komisionit Hetimor Parlamentar për menaxhimin e krizës energjetike, të nisur nga Partia Demokratike e Kosovës e me mbështetje të deputetëve opozitarë, do të zbardhim secilin fakt, do t’i japim përgjigje secilës pyetje dhe do të kërkojmë sqarim për secilin vendim që Qeveria ka marrë muajt e fundit në menaxhimin e krizës energjetike në vend”, shkroi ndër tjerash ai.
Po ashtu, Krasniqi thotë se me formimin e këtij Komisioni, qytetarët “do ta kuptojnë pse qeveria i detyroi të paguajnë 100 për qind më shtrenjtë energjinë elektrike”.
“Mbi të gjitha, qytetarët e Kosovës do ta kuptojnë se pse Qeveria i detyroi të paguajnë 100 për qind më shtrenjtë energjinë elektrike në emër të importit, kur Kosova prodhoi mjaftueshëm energji. Po ashtu, do të mësojmë se ku shkuan dhe si u shpenzuan mbi 100 milionë euro të cilat u ndanë për të subvencionuar energjinë. Qytetarët kanë kërkuar llogaridhënie dhe transparencë – ne do të sigurohemi që ata t’i kenë të dyja”, shtoi ai./teve1.info/
