Kryetari i PDK-së, Memli Krasniqi ka reaguar pas vrasjes së një gruaje nga ish-bashkëshorti i saj në Ferizaj.
Ai tha se kjo është një tragjedi që shkakton shumë dhembje dhe e cila nuk mund të përmblidhet me fjalë.
Tutje, ai tha se Kosova nuk guxon të shndërrohet në një vend ku gratë vriten në mënyrë të ripërsëritur e ku nuk ka ndëshkueshmëri maksimale.
“Emri i saj ishte Erona! Ajo ishte 21 vjeç dhe kishte një djalë. Jeta e saj, pa filluar ende mirë, sot iu shua nga ish-bashkëshorti i saj. Një tragjedi që shkakton shumë dhembje dhe e cila nuk mund të përmblidhet me fjalë. Fatkeqësisht, një krim që vjen dhe ripërsëritet muaj pas muaji në vendin tonë.
Përtej fjalëve dhe thirrjeve, sot, rëndësi kanë veprat. Jo vetëm ato të organeve të drejtësisë, por të të gjitha mekanizmave të shtetit – politik dhe administrativ. Kosova nuk guxon të shndërrohet në një vend ku gratë vriten në mënyrë të ripërsëritur e ku nuk ka ndëshkueshmëri maksimale. Kosova nuk guxon të kthehet në një vend ku gratë shndërrohen në numra. Emri i saj ishte Erona. Ajo ishte 21 vjeç. Ngushëllimet më të thella familjes!”, ka shkruar Krasniqi.
Ndryshe, Policia ka bërë të ditur se në këtë rast ka mbetur i plagosur edhe vëllai i mitur i 21 vjeçares.
Ndërsa, Prokuroria Themelore në Ferizaj ka njoftuar se i dyshuari për këtë rast është ndaluar për 48 orë./teve1.info
