Kryetari i Partisë Demokratike të Kosovës, Memli Krasniqi, e quajti “krim të organizuar”, shtrenjtimin e energjisë elektrike.
Gjatë seancës plenare në Kuvend, Krasniqi tha se të gjithë ata që janë të përfshirë në këtë çështje, do të japin përgjegjësi me çdo kusht.
“Ju mund të tentoni t’i pengoni hetimet, ashtu siç i keni penguar hetimet për rezerva. Por, s’mund të pengoni tërë jetën, sepse ky është krim i organizuar i cili nuk vjetrohet. Krejt ata që janë të përfshirë në këtë krim, që më së shumti e ka traget qytetarin e Kosovës, dijeni që do të jepni përgjegjësi, me vetëdije, e pa vetëdije. E keni fshehur hetimin parlamentar për rezerva, por as aty s’do të shpëtoni, mbajeni në mend. Keni me tentu me i fshehë edhe këto të energjisë, po as këto s’kanë me shpëtu. Ky është krim i organizuar”, deklaroi Krasniqi para deputetëve.
Sot në Kuvend po mbahet seancë e jashtëzakonshme lidhur me kërkesën e partive opozitare, të cilat kërkojnë zbritjen e çmimit të energjisë dhe largimin e bllok tarifave./teve1.info/.