Kryetari i Partisë Demokratike të Kosovës, Memli Krasniqi, ka thënë se insistimi i Vetëvendosjes për të vazhduar në mënyrë të njëjtë të votimit të fshehtë, tregon se për partinë fituese vendimet e Gjykatës Kushtetuese janë të parëndësishme.
Krasniqi ka thënë se në aktgjykimin e kushtetueses është thënë qartë se rendi i ditës nuk mund të ndërrohet.
“Nuk është situatë e njëjtë si para aktgjykimit të Gjykatës Kushtetuese. Nëse ka një qartësi të qartë nga ai aktgjykim është se rendi i ditës nuk mund të ndryshohet sidomos në mënyrë arbitrare. Insistimi që sot të vazhdohet si në seancat e kaluara i bie që për Kurtin dhe Vetëvendosjen as Gjykata Kushtetuese e as vendimet e saj nuk kanë kurrfarë vlere”, tha Krasniqi në një deklarim për media pas dështimit të seancës.
Ai ka thënë se sot ka pas shkelje të qëllimshme të Gjykatës Kushtetuese.
Krasniqi i ka bërë thirrje VV-së që t’i kthehet votimit të hapur.
