Partia Demokratike e Kosovës (PDK) ka bërë kërkesë tek kryesuesi i seancës konstituive, Avni Dehari për takim konsultativ me grupet parlamentare. Kryetari i kësaj partie, Memli Krasniqi tha se në këtë takim duan të sigurohen nëse Lëvizja Vetëvendosje “nuk dëshiron të jap kandidat më të denjë, më të përgatitur dhe më të duhur”.
Ai tha se nëse kjo parti e vlerësojnë Dimal Bashën si kandidatin më të mirë, atëherë do të marrë votat e PDK-së.
Ai në konferencë për media, në hollin e Kuvendit të Kosovës para seancës konstituive tha se ka bërë kërkesë tek kryesuesi i seancës, Avni Dehari, për takim konsultativ me grupet parlamentare.
“Njëjtë sikur në vazhdimin e seancës pardje, kur para votimit për kryetar të Kuvendit kërkuam një konsultim 10 minutësh mes partive parlamentare një gjë të tillë e kemi bërë edhe sot si GP i PDK-së, tashmë edhe zyrtarisht, duke e adresuar një kërkesë në drejtim të kryesuesit të seancës, zotëri Deharit. Kërkesa jonë edhe sot, ashtu siç ishte pardje, por që na u pamundësua në mënyrë arbitrare është që të takohemi me grupet parlamentare. Nuk kemi nevojë për konsultë mes nesh, sepse qëndrimi jonë është i qartë, por arsyeja e kërkesës ka qenë që të takohemi me grupet tjera për të mundësuar konstituimin e Kuvendit dhe para se gjithash për t’u siguruar që LVV vërtetë është e sigurtë që nuk dëshiron ta jap një kandidat po e quaj më të denjë, më të përgatitur dhe ndoshta së paku më të duhur se sa kandidati që e propozuan për të qenë kryetar i Kuvendit”, deklaroi Krasniqi.
Ai tha se propozimi i Dimal Bashës për kryeparlamentar para dy ditëve, siç u shpreh Krasniqi, është taktizim.
“Mënyra se si e kanë propozuar, në mënyrë të befasishme, tendencioze, papritmas nuk ishte mënyra për ta zgjedhur vërtetë. Ishte më shumë taktizim për të treguar se po dëshirojnë ta testojnë pozicionin tonë. Megjithatë, unë e rishpreh edhe një herë siç e thash menjëherë pas seancës para dy ditësh, ne i qëndrojmë besnik qëndrimit tonë që votojmë një kandidat që nuk ka qenë pjesë e ekzekutivit. Por, kërkesa për konsultë si atë ditë edhe sot është për t’i thënë LVV-së që a jeni të sigurt që vërtetë dëshironi ta degradoni nivelin e përfaqësimit të Kuvendit të Kosovës duke vendosur një kandidat që për mendimin tonë as nuk është i duhuri e as nuk i plotëson kriteret bazike për të qenë kryetar i Kuvendit. Megjithatë, nëse LVV vërtetë e konsideron se Dimal Basha apo një i tillë është kandidati më i mirë që ata e kanë për këtë pozicion dhe që i përfaqëson qytetarët e Kosovës ne do ta votojmë edhe pse nuk besojmë që një gjë e tillë qëndron”, shtoi Krasniqi.
Kujtojmë se Kuvendi i Kosovës sot mblidhet në seancën konstituive në tentimin e 58-të për konstituimin e legjislativit.
