Krasniqi përmes një postimi në Facebook, ka thënë se masakra në Abri të Epërme dhe 400 masakrat tjera të kryera nga Serbia në Kosovë janë dëshmi që Serbia ka synuar të shfaroste shqiptarët, shkruan teve1.info
“Para 24 vjetëve, gjenocidi serb kundër shqiptarëve u përsërit me fytyrën e vet të vërtetë, me tërë brutalitetin e ushtrisë okupatore në Abri të Epërme, ku cak i sulmeve ishte Familja Deliu. Në këtë ditë, u masakruan 23 anëtarë të pafajshëm të kësaj familjeje të madhe. Kjo masakër në Abri të Epërme, sikur edhe mbi 400 masakrat tjera të kryera nga Serbia në Kosovë, janë dëshmi se ky shtet okupator, synonte të shfaroste shqiptarët me tërë arsenalin ushtarak dhe me metodat më barbare të mundshme”, ka shkruar ai.
Ai ka thënë se historia jonë nuk do të harrojë asnjëherë se sa më vlerë është liria që gëzojmë.
“Me nderim i përkulemi sakrificës së Familjes Deliu, për 23 anëtarët e saj, nga më i vjetri Fazliu, 94 vjeçar, deri te Valmiri 2 vjeç dhe Diturija e cila atë ditë ishte vetëm gjashtëjavëshe. Historia jonë nuk do të harrojë asnjëherë se sa me vlerë është liria që gëzojmë sot dhe sa e vështirë ishte rruga që kaloi populli ynë deri në çlirim”, ka shkruar Krasniqi.
Kreu i PDK-së po ashtu përkujtoi edhe Vesel Demakun, Valdet Xhemajlin e Afrim Hajdarajn që ranë po atë ditë nga Abria e Epërme.
