Kryetari i Partisë Demokratike të Kosovës, Memli Krasniqi i ka kërkuar raportuesit për Kosovën në Parlamentin Evropian, Riho Terras lobim për heqjen e masave ndaj Kosovës.
Ai këtë e ka kërkuar në takimin që ka zhvilluar me eurodeputetin i cili po qëndron në Kosovë
“Në takim theksova përkushtimin e palëkundur të Partisë Demokratike të Kosovës për të avancuar integrimin e Kosovës në BE, një mision që mbetet në thelb të agjendës sonë politike. Nga raportuesi Terras kërkova që të avokoj për heqjen e masave ndëshkuese të BE-së ndaj shtetit tonë, pasojat e të cilave po i vuajnë qytetarët tanë”, ka shkruar Krasnqi.
Duke folur për sulmet e Serbisë ndaj Kosovës, Krasniqi ka thënë se këto veprimet nuk duhet të kalojnë pa përgjigje nga ana e BE-së.
“ Gjithashtu, nënvizova nevojën urgjente që Bashkimi Evropian të reagojë ndaj sulmeve të vazhdueshme të Serbisë ndaj Kosovës dhe sovranitetit tonë. Provokimet e vazhdueshme nuk duhet të kalojnë pa përgjigje, pasi rrezikojnë stabilitetin në rajon dhe minojnë përpjekjet tona për një të ardhme më paqësore dhe më të mire”, ka shkruar ai.
