Kryetari i Partisë Demokratike të Kosovës, Memli Krasniqi, ka thënë se duhet të ketë hetim të plotë për të identifikuar shkaqet e lëndimit të minatorëve në minierën e Trepçës.
Teksa ka thënë se kjo ngjarje e ndodhur kërkon përgjegjësi, Krasniqi ka shkruar se përkundër kërkesave të vazhdueshme ndaj Qeverisë Kurti, minatorët kanë përjetuar “mungesën e trajtimit adekuat”
“Ngjarja e rëndë në minierën e Stantërgut, ku 12 punëtorë të Trepçës kanë marrë lëndime, është shqetësuese dhe kërkon përgjegjësi. Është e domosdoshme të zhvillohet një hetim i plotë dhe i pavarur për të identifikuar shkaqet dhe përgjegjësitë në këtë ngjarje e cila ka mundur të përfundoj me fatalitet. Punëtorëve të lënduar ju dëshiroj shërim të shpejtë dhe mbështetje të plotë në këtë moment të vështirë për ta. Përkundër kërkesave të vazhdueshme ndaj Qeverisë aktuale, minatorët e Trepçës kanë përjetuar mungesën e trajtimit adekuat”, ka shkruar Krasniqi në Facebook.
Po ashtu, kreu i PDK-së, ka deklaruar se Qeveria aktuale duhet të dëgjoj kërkesat e minatorëve dhe të ndërmarr veprime urgjente për të garantuar kushte më të mira në vendin e punës.
Kujtojmë se incidenti ka ndodhur të mërkurën në horizontin e njëmbëdhjetë të minierës së Stantërgut në Mitrovicë të Jugut.
Zyrtarët shëndetësorë në Spitalin e Përgjithshëm të Mitrovicës kanë thënë se ndihmë mjekësore kanë kërkuar 12 minatorë dhe se dy prej punëtorëve kanë pësuar lëndime më serioze në sy, ndërsa të tjerët në gjymtyrë./teve1.info/
