Përmes një postimi në Facebook, ai thotë se parimet e Organizatës Ndërkombëtare të Punës për të Drejtën për Grevë nuk e kundërshtojnë zbritjen e pagës për secilën ditë të pjesëmarrjes në grevë.
“Zbritja e pagës për ditët e pjesëmarrje në grevë nuk është e jashtëligjshme. Parimet e Organizatës Ndërkombëtare të Punës (ILO) për të Drejtën për Grevë, nuk e kundërshtojnë zbritjen e pagës për secilën ditë të pjesëmarrjes në grevë me 1/30 e pagës mujore. Nëse zbritja do të ishte më e lartë sesa shumë që mund të fitohet brenda muajit, atëherë do të kishte karakter ndëshkues”, shkroi ndër tjerash ai.
Tutje, Krasniqi theksoi se në anën tjetër kërkesat e sindikalistëve për shtesë të pagës janë të drejta për shkak se “po ballafaqohemi me inflacionin më të lartë në dekadat e fundit”.
“Kërkesat e sindikalistëve për shtesë të pagës janë të drejta. Po ballafaqohemi me inflacionin më të lartë në dekadat e fundit. Me kosto shtesë për të gjetur alternativa për furnizim me energji elektrike, e menduar për dimrin që kemi përpara. Në raste si këto, dora e shtetit duhet të ndihet. Në vend të saj, Qeveria ka mbyllur edhe veshët. Krekoset çdo ditë se si vendi ynë është duke përjetuar zhvillim të “pashembullt” ekonomik, por që ky zhvillim nuk po përkthehet në mirëqenie për shtetasit e saj”, shkroi tutje ai.
Qeveria e Kosovës ka paralajmëruar pezullim të pagës për të gjithë punëtorët gjatë qëndrimit në grevë.
Këtë e ka kundërshtuar BSPK, madje ka dorëzuar edhe kallëzim penal ndaj Ministrisë së Financave./teve1.info/
