Vasfije Krasniqi -Goodman në edicionin e dytë të Forumit për Gratë Paqen dhe Sigurinë ka rrëfyer tmerrin që ka përjetuar në luftën e fundit në Kosovë.
Krasniqi-Goodman u ka bërë thirrje institucioneve që t`i thërrasin në llogari të gjithë kryerësit e krimeve ndaj saj dhe mijërave grave tjera të Kosovës.
“Unë kam mbijetuar armën më mizore të luftës, por për ne si të mbijetuar shumë prej këtyre përjetimeve nuk marrin fund kurrë. Drejtësia nuk është ndarë, bëjë thirrje ndaj institucioneve që t’i thërrasin në llogari të gjithë kryerësit e krimeve ndaj meje dhe dhjetëra mijëra të tjerëve si unë”, ka thënë Krasniqi – Goodman.
Tutje, ajo ka thënë se Kosova nuk ka luftuar asnjëherë për hakmarrje ose për shkatërrim të të tjerëve, por për liri.
“Qëndroj para gjithë njerëzve të botës për t’i rikujtuar që Kosova asnjëherë s’ka luftuar për hakmarrje apo për shkatërrim të të tjerëve. Ne kemi luftuar për liri nga regjimi i Millosheviqit dhe krimet që u kryen ndaj popullit tonë”, ka thënë Krasniqi – Goodman në Forumin Ndërkombëtar për Gratë, Paqen dhe Sigurinë.
Ndryshe, Vasfije Krasniqi – Goodman ka qenë e para e mbijetuar e dhunës seksuale që në mënyrë publike ka treguar rrëfimin e saj të përdhunimit, duke u bërë zë i mijëra të mbijetuarve burra e gra./teve1.info/
