Kryetari i Partisë Demokratike të Kosovës, Memli Krasniqi i ka reaguar kryeministrit, Albin Kurti, i cili e ka quajtur katastrofale nënshkrimin e marrëveshjes së ish-presidentit, Hashim Thaçi me NATO-në për shkuarjen e FSK-së në veri.
Krasniqi ka thënë se Kurti është duke mashtruar për këtë letër, siç tha ai asnjë fjali nuk është shkruar që nuk mundet FSK me shku në veri, por që duhet të jetë në koordinim.
“Që disa herë del dhe mashtron për letrën e dakordume me NATO-n. Aty nuk thotë në asnjë fjali që nuk mund me shku FSK-ja në veri, por thuhet që duhet me shku në dakordim dhe në pajtim me NATO-n, sepse në fund të fundit, pak më herët thatë se është më rëndësi që më hyrë në partneritet për paqe, e një gjë të tillë nuk mundësh me arrit nëse vepron pa pasur një kordinim me ta”, ka thënë Krasniqi në Kuvend.
Ndryshe ,Kurti këtë marrëveshje e cilësoi katastrofale, duke thënë se për shkak të saj, është i kushtëzuar në raportet me NATO-n.
“Kufirin e kemi shumë të gjatë me Serbinë, 381 kilometër, më i gjati është në Podujevë, mandej në Leposaviq. Në Leposaviq kufirin do të duhej, po edhe në Zubin Potok dhe në Zveçan me na ruajtur ushtria. Mirëpo me datë 19 prill 2013, ish-kryeministri Thaçi ia ka çu një letër ish-sekretarit të përgjithshëm të NATO-s që FSK-ja se kalon Ibrin. Katastrofë është ajo letër. Unë jam i kushtëzuar në raportet me NATO-n për shkak të qasaj letre. Prandaj, para se me u kualifiku me na bë këtë kritikë e me kqyr me na marrë në pyetje trego a është gabim apo është në rregull qajo letër. Sepse, kufirin nuk ta ruan, e nuk ta mbron policia si ushtria”, tha kryeministri Kurti.
Tutje, ai tha se po të mos ishte ajo letër e 2013-tës, Forca e Sigurisë së Kosovës do të ishte në veri, dhe ajo do ta ruante kufirin, jo Policia e Kosovës.
“Mos të ishte ajo letër, ne e kishim pas Forcën e Sigurisë së Kosovës në veri të Kosovës, nuk e kemi. Po na duhet me këto vegla e mjete pune që i kemi ta bëjmë maksimumin”./teve1.info
