Kryetari i Partisë Demokratike të Kosovës, Memli Krasniqi, ka vizituar prodhuesit dhe ndërmarrësit e Komunës së Vitisë, ku thotë se është i papranueshëm diskriminimi që Qeveria Kurti po ua bën qytetarëve përmes ndarjeve buxhetore.
Krasniqi, i shoqëruar nga kryesuesi i Kuvendit Komunal të Vitisë, Bekim Azizi, njëherit kryetar i Degës së PDK-së në Viti, kanë diskutuar me ndërmarrësit dhe sportistët për sfidat me të cilat ata po ballafaqohen, si dhe me kërkesat dhe nevojat që kanë këto komunitete.
“Vetëm 4 euro për kokë banori për qytetarët e Vitisë i ka ndarë Qeveria me buxhetin e vitit të ardhshëm për projektet e reja investive. Është e papranueshme, është vërtetë një diskriminim i paparë ndonjëherë dhe i cili nuk e ndihmon zhvillimin e mëtutjeshëm të komunitetit dhe të komunës”, ka thënë Krasniqi.
Ndërsa, kryesuesi i Kuvendit Komunal të Vitisë, Bekim Azizi tha se rekomandimet e marra nga prodhuesit edhe sportistët dhe do t’i kenë parasysh në hartimin e programeve konkrete për ta.
“Në këto takime që patën në vizitën e disa prodhuesve, duke pasur parasysh që prodhimi është gjëja kryesore, që kontribuon për vendin, që ndihmon zhvillimin ekonomik, që ndihmon edhe në perspektivën e të rinjve”, tha Azizi.
Ndërkohë, Krasniqi vizitoi klubin e basketbollit “Vitia”, ku zhvillojnë ushtrimet rreth 100 anëtarë të të gjitha kategorive të reja.
