Kryetari i Partisë Demokratike të Kosovës, Memli Krasniqi, i ka ftuar deputetët e Kuvendit të Kosovës që gjatë seancës së nesërme të votojnë Rezolutën për të mbështetur Policinë e Kosovës.
Krasniqi në Facebook tha se vota e deputetëve dëshmon mbështetjen për Policinë e Kosovës sepse sipas tij, vetëm fjalët dhe postimet në rrjetet sociale nuk mjaftojnë.
“Nesër kemi thirrur seancë të jashtëzakonshme për ta miratuar këtë Rezolutë. Policët tonë meritojnë shtesat për rrezikshmërinë, sigurimin shëndetësor dhe miratimin e Ligjit për pensionim të parakohshëm. I ftoj të gjithë deputetët e Kuvendit të Kosovës që nesër, me votën e tyre, të dëshmojnë se e mbështesin dhe janë me Policinë e Kosovës – sepse vetëm fjalët dhe postimet në rrjetet sociale nuk mjaftojnë!”, ka shkruar ai.
Ndryshe në seancën paraprake Rezoluta e propozuar nga PDK në lidhje me përkrahjen e pjesëtarëve të Policisë së Kosovës nuk është futur në rend të ditës.
Kjo pasi vetëm 36 nga deputete të opozitës votuan pro, ndërsa pozita abstenuan pasi sipas tyre nuk ka asnjë material të përgatitur, as nuk dihen implikimet buxhetore, prandaj duhet ulur paraprakisht dhe diskutuar për propozimet dhe dakordimet e përbashkëta.
Në rezolutën e prezantuar nga Tahiri, përfshin buxhetimin shtesë për pension të parakohshëm, shtesat e rrezikshmërisë dhe sigurimi shëndetësor.
Këtë propozim të PDK-së e ka kundërshtuar kryetarja e Grupit Parlamentar të VV-së, Mimoza Kusari Lila.
Mbështetje i kanë dhënë edhe dy partitë tjera opozitare, Lidhja Demokratike e Kosovës dhe Aleanca për Ardhmërinë e Kosovës./teve1.info./