Kryetari i Partisë Demokratike të Kosovës, Memli Krasniqi, e ka quajtur të papranueshme dhe papërgjegjësi politike, bojkotin që pushteti po i bënë Rezolutës së propozuar nga kjo parti, përmes së cilës do të mbështetej Policia e Kosovës.
Krasniqi thotë se ky bojkot vjen në kuadër të veprimeve “të papërgjegjshme dhe hakmarrëse të këtij pushteti përgjatë gjithë mandatit deri sot”.
“Regresi ekonomik, sanksionet ndërkombëtare dhe përkqeqësimi i mirëqenies së qytetarëve janë vetëm disa nga pasojat të cilat vijnë si rezultat i keqqeverisjes, arrogancës dhe aferave të vazhdueshme korruptive të zyrtarëve qeveritarë”, thuhet në komunikatë të partisë.
Krasniqi ka zhvilluar sot takime me kryesinë e partisë si dhe me kryetarët e degëve nëpër Kosovë.
Gjatë këtij takimi bëhet e ditur se temë e diskutimit ka qenë edhe mosdekretimi i kryeprokurorit të shtetit nga ana e presidentes së Kosovës, Vjosa Osmani.
“Në takim u diskutua edhe për mosdekretimin e Kryeprokurorit të shtetit nga ana e Presidentes Vjosa Osmani – Sadriu, vendim të cilin po e shqyrtojnë eskpertët ligjor të PDK-së, të cilët me kohë do të propozojnë veprimet për trajtimin e kësaj çështje”, thuhet në njoftim.
Ndërkohë, Krasniqi ka mirëpritur edhe Rezolutën e miratuar në Parlamentin Evropian.
“Gjatë këtyre takimeve, Kryetari Krasniqi e ka përshëndetur edhe Rezolutën e miratuar në Parlamentin Evropian, në të cilën dënohet sulmi terrorist i 24 shtatorit në Banjskë, ku mbeti i vrarë rreshteri i Policisë së Kosovës, Heroi Afrim Bunjaku”.
