Kryetari i PDK-së, Memli Krasniqi, ka akuzuar Qeverinë e tanishme të Kosovës për ikjen e 210 mijë banorëve nga Kosova.
Krasniqi ka thënë se numri i banorëve rezidentë prej 1,586,659 është shifër pikëlluese, përderisa në vitin 2020 ishin 1,798,186.
“Përkundër vonesave dhe shtyerjeve të shumta të regjistrimit të popullsisë nga ana e Qeverisë, më në fund, Agjencia e Statistikave të Kosovës sot publikoi numrin e banorëve rezidentë në vendin tonë. Pa u lëshuar këtu në saktësinë e shifrave të publikuara, është lajm i keq dhe shumë i dhembshëm që, duke u bazuar në publikimet zyrtare të ASK-së, po konfirmohet se vetëm në katër vitet e fundit, Kosova i ka humbur mbi 210 mijë banorë. Sipas ASK-së, në vitin 2020 Kosova kishte 1,798,186 banorë. Ndërsa, sot, kjo Agjenci publikoi shifrën pikëlluese prej vetëm 1,586,659 banorëve rezidentë”, ka shkruar Krasniqi në Facebook.
Tutje, ai ka shkruar se rinia po e braktisë Kosovën, e Qeveria po ia braktis ëndrrat.
“Qytetarët, e veçmas rinia e Kosovës, po e braktistin vendin! Ose, thënë më mirë, Qeveria i ka braktisur ata dhe ëndrrat e tyre. Ky lajm i gëzon vetëm ata që nuk ia duan të mirën vendit tonë. Kjo shifër kërkon veprime politike emergjente. Qytetarët tanë meritojnë më shumë dhe më mirë – pranë familjeve të tyre dhe në vendin e vet”, ka shkruar Krasniqi.
1 milion e 586 mijë e 659 banorë rezidentë ka Kosova, sipas regjistrimit të fundit popullsisë, ekonomive familjare dhe banesave. Prej tyre, 795 mijë 45 janë meshkuj dhe 791 mijë e 614 femra. Këto të dhëna preliminare i ka prezantuar sot në një konferencë ushtruesi i detyrës së drejtorit të Agjencisë së Statistikave të Kosovës, Avni Kastrati./teve1.info/
