Ish-kryetari i Akademisë së Shkencave dhe Arteve të Kosovës, Mehmet Kraja, ka shprehur ngushëllime për ndarjen nga jeta të akademikut dhe shkrimtarit të njohur Rexhep Qosja, duke theksuar se me vdekjen e tij përmbyllet një epokë e rëndësishme e mendimit dhe idealizmit kombëtar.
Në reagimin e tij, Kraja ka vlerësuar Qosjen si “zërin e ndërgjegjes së zgjuar kombëtare” dhe një figurë që, sipas tij, ka lënë gjurmë të thella në historinë e mendimit shqiptar.
“Rexhep Qosja ishte zëri i ndërgjegjes së zgjuar kombëtare: bashkë me të merr fund epoka e idealistëve të mëdhenj, të cilët për kombin folën me zë që kumbon larg dhe tejkalon kufizimet e kohës”, ka shkruar Kraja.
Ai ka shtuar se Qosja zë një vend të rëndësishëm në historinë e letërsisë dhe mendimit shqiptar, duke e krahasuar kontributin e tij me atë të rilindësve dhe duke e cilësuar veprën e tij si referencë të qëndrueshme akademike.
Kraja ka pranuar se shpesh nuk ka qenë dakord me qëndrimet e Qosjes, por e ka vlerësuar gjithmonë mendimin e tij.
“Ai edhe kur gabonte, nuk mund të ishte gjë tjetër pos patriot i zhgënjyer. Gjithmonë kam konsideruar se ai thoshte të vërteta të mëdha për kombin, për identitetin, për letërsinë dhe historinë tonë”, ka theksuar ai.
Në reagimin e tij, Kraja ka kritikuar gjithashtu qëndrimet e mëhershme ndaj Qosjes në Akademinë e Shkencave dhe Arteve të Kosovës, duke kërkuar reflektim mbi vendimet dhe sjelljet ndaj tij.
“Sekush në Akademinë e Shkencave dhe Arteve të Kosovës ka punë ta pastrojnë ndërgjegjen e tij, pse ia mbyllën derën e këtij institucioni Rexhep Qosjes. Duhet të gjejnë kurajë dhe ta pastrojnë ndërgjegjen edhe ata që shpifën, e shkelën dhe u përpoqën ta njollosnin emrin e tij. I përjetshëm qoftë kujtimi për Rexhep Qosjen”, ka përfunduar Kraja./teve1.info/
