Komisioni Qendror i Zgjedhjeve (KQZ) ka miratuar sot vendimin për shfrytëzimin e buxhetit për zgjedhjet e jashtëzakonshme parlamentare që do të mbahen më 28 dhjetor, ndërsa ka bërë të ditur se i gjithë procesi do t’i kushtojë shtetit 7,771,486.56 euro.
Sipas përfaqësuesit të Sekretariatit të KQZ-së, Besnik Buzhala, në këtë shumë përfshihen tre kategori kryesore të shpenzimeve: Pagat, Mallrat dhe shërbimet, Shtypja e fletëvotimeve, si dhe shërbime të tjera të domosdoshme si shërbimet postare, transporti i materialit zgjedhor, broshurat informuese, tërheqja e shortit për subjektet politike dhe shërbimet komunale.
KQZ ka rikujtuar se për zgjedhjet e përgjithshme të mbajtura më 9 shkurt ishin planifikuar 8.7 milionë euro, ndërsa shuma e shpenzuar ka arritur në rreth 7.9 milionë euro.
Ndërkohë, për zgjedhjet lokale që u zhvilluan në 38 komuna në rundin e parë dhe në 18 komuna në rundin e dytë, ishte planifikuar buxhet prej 10.5 milionë eurosh. Sa i përket kostos përfundimtare të këtij procesi, KQZ njofton se shifra do të bëhet e ditur pas përmbylljes së të gjitha fazave administrative, por sipas përvojave të kaluara, shpenzimet zakonisht rezultojnë më të ulëta se planifikimet fillestare.
Sipas vendimit të ri të KQZ-së, secili subjekt politik që garon në zgjedhjet e 28 dhjetorit mund të shpenzojë deri në 2,047,149 euro, ose jo më pak se 1 euro për çdo votues të regjistruar. Vendimi synon të rregullojë dhe standardizojë financimin e fushatave zgjedhore, në përputhje me legjislacionin aktual.
