Komisioni Qendror i Zgjedhjeve ka bërë të ditur se të gjitha qendrat e votimit në Kosovë janë hapur në kohë dhe procesi zgjedhor po zhvillohet në të gjithë territorin e vendit.
Zëdhënësi i KQZ-së, Valmir Elezi, në një konferencë për media tha se votimi brenda Kosovës është duke u organizuar në 949 qendra votimi, me gjithsej 2,550 vendvotime.
Sipas tij, shumica e qendrave i takojnë votimit të rregullt, ndërsa një pjesë tjetër është e dedikuar për votimin me kusht, që është organizuar në secilën komunë të vendit.
Elezi theksoi gjithashtu se, sipas Listës Votuese, numri i qytetarëve me të drejtë vote brenda Kosovës arrin në 1,959,962 votues.
Ai shtoi se procesi zgjedhor po zhvillohet pa probleme të theksuara dhe nën monitorimin e institucioneve përgjegjëse.
