Komisioni Qendror i Zgjedhjeve (KQZ) ka njoftuar se sot do të shpallen rezultatet për zgjedhjet e jashtëzakonshme në katër komunat veriore të Kosovës të cilat janë mbajtur më 23 prill.
Siç ka njoftuar KQZ, duke filluar nga ora 13:15 do të mbahet mbledhja e radhës.
Pikë e rendit të ditës është edhe shpallja e rezultateve për zgjedhjet për kryetar të komunave në Mitrovicë e Veriut, Zveçan, Leposaviq dhe Zubin Potok, si dhe zgjedhjet e parakohshme për kuvendet e komunave në Zveçan dhe Leposaviq.
Ndryshe, Bashkimi Evropian ka thënë së zgjedhjet e mbajtura të dielën në katër komunat në veri të Kosovës të banuara me shumicë serbe, nuk ofrojnë zgjidhje afatgjate politike, për shkak të bojkotit nga shumica e qytetarëve në këto komuna.
Sipas deklaratës së zëdhënësit të BE-së, Peter Stano vetëm kthimi i serbëve në këto institucione ofron zgjidhje e që sipas tij, Kosova duhet ta bëjë këtë.
Pjesëmarrja në zgjedhjet e jashtëzakonshme të 23 prillit ishte 3.47 përqind.
VV-ja do të udhëheqë në Mitrovicën e Veriut, ku kandidati i saj, Erden Atiq ka fituar 519 vota apo 66.5 për qind.
Po ashtu, në Leposaviq, Lulzim Hetemi i VV-së mori shumicën e votave – 100 vota apo 73.5 për qind.
Ndërkohë, PDK-ja do të udhëheqë me Zubin-Potokun, ku kandidati i saj, Izmir Zeqiri, mori 196 vota apo 52.1 për qind.
PDK-ja do ta ketë kryetarin e komunës edhe në Zveçan. Ilir Peci mori 114 vota apo 60 për qind./teve1.info/
