Komisioni Qendror i Zgjedhjeve ka rikujtuar qytetarët për procedurat që duhet të ndjekin gjatë votimit në zgjedhjet e parakohshme të 7 qershorit, duke publikuar udhëzime për mënyrën e plotësimit të fletëvotimit.
Sipas KQZ-së, votuesit duhet fillimisht të kontrollojnë nëse fletëvotimi që marrin është i vulosur në pjesën e pasme, pasi vetëm një fletëvotim i tillë konsiderohet i vlefshëm.
Më pas, në pjesën e majtë të fletëvotimit duhet të shënohet vetëm një subjekt politik. Ndërkaq, në pjesën e djathtë qytetarët kanë mundësinë të përzgjedhin deri në dhjetë kandidatë nga subjekti politik që kanë votuar.
Pas përfundimit të votimit, fletëvotimi duhet të paloset dhe të vendoset në kutinë e votimit sipas procedurave të përcaktuara.
KQZ ka apeluar te votuesit që t’i respektojnë këto udhëzime për të shmangur pavlefshmërinë e votës dhe për të siguruar një proces të rregullt zgjedhor.
