Kryetari i Komisionit Qendror të Zgjedhjeve në Shqipëri, Ilirjan Celibashi, ka deklaruar se në shtatë qendra të votimit në Tiranë dhe Durrës po qëndrojnë persona të paautorizuar.
“Ka prani në ambiente të personave të paautorizuar, ne e konsiderojmë si intimidim dhe presion ndaj është rasti që autoritetet ligjzbatuese nga Policia apo KZAZ dhe KQV ta adresojnë dhe të merren mesat përkatëse. Është e papranueshme që qytetarë që nuk ka lidhje, të rrinë në ambientet e brendshme, duhet të boshatisen menjëherë dhe kushdo që refuzon, do duhet të mbajë përgjegjësi”, ka thënë ai, raportoi A2CNN.
Ai shtoi se nuk ka asnjë informacion se cilat parti politike i përfaqësojnë këta persona të paautorizuar.
“Nuk e dimë se cilën parti përfaqësojnë ata”, shtoi kryekomisioneri.
Së fundmi, KQZ-ja ka përditësuar shifrat e pjesëmarrjes në zgjedhje. Deri në orën 13:00 rreth 23.20 për qind e qytetarëve kanë dalë në votime.
