Komisioni Qendror i Zgjedhjeve pritet t’u dërgojë institucioneve relevante, përfshirë edhe Këshillin Gjyqësor të Kosovës, listat e kandidatëve për verifikim para procesit të certifikimit për zgjedhjet e ardhshme.
Zëdhënësi i KQZ-së, Valmir Elezi, ka bërë të ditur se ky proces zhvillohet në bazë të nenit 30 të Ligjit për Zgjedhjet e Përgjithshme, i cili parasheh kufizime për kandidatët që janë dënuar me vendim të formës së prerë me një ose më shumë vjet burgim gjatë tri viteve të fundit.
Sipas tij, praktika e verifikimit është zbatuar edhe në proceset e mëparshme zgjedhore, ku KQZ ka kërkuar nga institucionet kompetente të konfirmojnë nëse ndonjë kandidat nuk i plotëson kriteret ligjore për kandidim.
“Komisioni Qendror i Zgjedhjeve do t’u dërgojë institucioneve relevante kërkesat për verifikim së bashku me listat e kandidatëve që synojnë të certifikohen për pjesëmarrje në këto zgjedhje, me qëllim të vlerësimit nëse ata janë në përputhje me nenin 30 të Ligjit të zgjedhjeve të përgjithshme. Në këtë mënyrë KQZ ka vepruar edhe në proceset e kaluara zgjedhore. Në mesin e institucioneve që KQZ do të dërgojë është edhe Këshilli Gjyqësor i Kosovës. Në nenin 30 për zgjedhjet e përgjithshme, thotë se kandidat nuk mund të jenë një person që në tri vitet e ufndit është dënuar me vendim gjyqësor të formës së prerë për vepër penale një ose më shumë vjet burgim, andaj KQZ do të kërkojë nga KGJK verifikimin e listës së kandidatëve për të konmstatuar nëse ndonjëri prej tyre bie ndesh me këtë kufizim”, tha Elezi./teve1.info/
