Të dielën, qytetarët e 18 komunave të Kosovës do t’u drejtohen sërish kutive të votimit për të zgjedhur kryetarët e rinj të komunave, pasi në zgjedhjet e mbajtura më 12 tetor asnjë kandidat nuk arriti të sigurojë shumicën e nevojshme të votave.
Komisioni Qendror i Zgjedhjeve (KQZ) ka bërë të ditur se për raundin e dytë të zgjedhjeve do të hapen gjithsej 18 qendra për votimin me kusht, të cilat do të përfshijnë 20 vendvotime në total.
Sipas njoftimit të KQZ-së, këto qendra janë shpërndarë nëpër komuna të ndryshme, me qëllim që të mundësohet ushtrimi i të drejtës së votës për të gjithë qytetarët që për arsye të caktuara nuk mund të votojnë në vendvotimet e tyre të rregullta.
KQZ ka publikuar tashmë edhe adresat e sakta të qendrave të votimit me kusht, të cilat do të jenë të hapura më 9 nëntor, në të njëjtën ditë kur mbahet edhe raundi i dytë i zgjedhjeve lokale. /teve1.info/
