Komisioni Qendror i Zgjedhjeve (KQZ) ka shpallur rezultatet përfundimtare të zgjedhjeve të parakohshme për Kuvendin e Kosovës, të mbajtura më 7 qershor, dhe njëkohësisht ka hapur afatin ligjor për paraqitjen e ankesave ndaj vendimit.
Sipas të dhënave zyrtare të publikuara nga KQZ, Lëvizja Vetëvendosje (LVV) ka fituar 47.13% të votave, duke siguruar 53 ulëse në Kuvendin e Kosovës.
Pas saj renditet Partia Demokratike e Kosovës (PDK) me 19.44% dhe 22 deputetë, Lidhja Demokratike e Kosovës (LDK) me 16.69% dhe 18 deputetë, si dhe Aleanca për Ardhmërinë e Kosovës (AAK) me 6.74% dhe 7 ulëse.
Nga partitë e komuniteteve, Lista Serbe ka siguruar 9 ulëse, ndërsa Kosova Demokratik Türk Partisi (KDTP) 2 ulëse. Subjektet tjera të komuniteteve do të përfaqësohen me nga një deputet në Kuvend.
KQZ ka njoftuar se subjektet politike dhe kandidatët kanë të drejtë të paraqesin ankesa ndaj rezultateve brenda 48 orëve në Panelin Zgjedhor për Ankesa dhe Parashtresa (PZAP).
Ky hap shënon fazën përfundimtare të procesit zgjedhor, ndërsa pritet shqyrtimi i mundshëm i ankesave para certifikimit përfundimtar të rezultateve.
