Komisioni Qendror i Zgjedhjeve në një komunikatë për media të mërkurën ka thënë se integriteti i votës së 9 shkurtit nuk është cenuar e se pavarësisht problemeve në proceset e deritashme, rezultatet përfundimtare do të jenë të sakta.
KQZ-ja ka thënë se është e “përkushtuar maksimalisht” që të kryhet sa më shpejt numërimi i votave të kandidatëve për deputetë dhe të bëhet verifikimi i votave të subjekteve politike nga formularët e plotësuar në vendvotime, të numërohen votat me kusht, atyre të personave me aftësi të kufizuara dhe votat nga votimi jashtë Kosovës.
“KQZ është e përkushtuar maksimalisht që të gjitha këto procese të kryhen në kohën më të shpejtë të mundur, por duke siguruar saktësi në evidentimin e vullnetit të çdo votuesi. KQZ sqaron se integriteti i votës nuk është i cenuar dhe pavarësisht vonesave që janë shkaktuar si pasojë e problemeve me platformën elektronike, rezultatet përfundimtare do të jenë të sakta dhe të bazuara në vullnetin e qytetarëve të shprehur përmes votës së tyre”, thuhet në njoftim.
Madje, Elezi ka bërë të ditur se procesin e numërimit të votave të kandidatëve për deputetë dhe verifikimin i votave të subjekteve politike, ka filluar gjatë ditës së djeshme në Qendrat Komunale të Numërimit në komunat, Prishtinë, Lipjan, Obiliq dhe Partesh.
Në QKN-të e Obiliqit, Lipjanit dhe Parteshit, procesi i numërimit dhe evidentimit të këtyre rezultateve në platformë elektronike dhe formularët digjital, është zhvilluar pa ndonjë problem, por në QKN-në e Prishtinës janë paraqitur probleme të herëpashershme. Aktualisht, procesi i numërimit është duke u zhvilluar në këto Qendra Komunale të Numërimit dhe gjatë ditës do të fillojë edhe në qendra të tjera, për të cilat do të njoftojmë.
Më tej, ai tha se KQZ i ka bërë thirrje Prokurorisë së Shtetit për ta sqaruar situatën dhe mbështetje teknike për ueb-faqen e KQZ-së që ka pasur probleme.
“Nisur nga fakti që të dielën në mbrëmje kishte probleme të mosfunksionimit të platformës për rezultatet preliminare, KQZ i ka bërë thirrje Prokurorisë së Shtetit dhe institucioneve tjera të sigurisë për ta sqaruar situatën dhe për mbështetje teknike.KQZ është vënë në dispozicion për bashkëpunim me të gjithë akterët relevantë dhe po punon që të përfundojë numërimi dhe adresimi i çështjeve teknike të mosfunksionimit. Ndërkaq, lidhur me rezultatet preliminare të subjekteve politike dhe të pjesëmarrjes, që gjatë këtyre ditëve janë evidentuar pasaktësi, KQZ njofton se janë duke ndërmarrë të gjitha veprimet për të bërë përmirësimet e nevojshme dhe publiku do të njoftohet me kohë”, thuhet ndër të tjera.
Webfaqja e KQZ-së ka pasur probleme që nga 9 shkurti kur ka filluar publikimi i rezultateve preliminare.
Prokuroria e Shtetit ka bërë të ditur se ka kërkuar informacione nga KQZ nëse ka pas ndërhyrje në webfaqen zyrtare./teve1.info/
