Komisioni Qendror i Zgjedhjeve ka certifikuar sot rezultatet e zgjedhjeve të raundit të dytë për kryetarë të 18 komunave të Kosovës, të cilat janë mbajtur më 9 nëntor.
Sipas njoftimit zyrtar, rezultatet janë certifikuar për komunat e mëposhtme: Gjakovë, Gjilan, Dragash, Kaçanik, Klina, Fushë Kosovë, Mitrovicë e Jugut, Obiliq, Rahovec, Pejë, Prishtinë, Prizren, Suharekë, Viti, Vushtrri, Junik, Mamushë dhe Kllokot.
Ky certifikim i fundit përfshin raundin e dytë të zgjedhjeve për kryetarët e komunave, ndërsa javë më parë KQZ ka përmbyllur edhe certifikimin e rezultateve për 20 komuna të tjera, ku fituesit ishin zgjedhur në raundin e parë të zgjedhjeve.
Përveç certifikimit të rezultateve për kryetarët, KQZ ka certifikuar gjithashtu rezultatet e zgjedhjeve për Kuvendet Komunale të 27 komunave, me përjashtim të Kuvendit Komunal të Istogut, ku aktualisht është duke u shqyrtuar një ankesë.
Rezultatet janë publikuar këtu: https://kqz-ks.org/rezultatet/zgjedhjet-per-kryetare-te-komunave/
