Komisioni Qendror i Zgjedhjeve (KQZ) ka publikuar një njoftim sensibilizues për qytetarët në prag të zgjedhjeve të parakohshme për Kuvendin e Republikës së Kosovës, që do të mbahen më 7 qershor.
Përmes një posteri informues, KQZ rikujton se votimi familjar është i ndaluar me ligj dhe se çdo qytetar duhet ta ushtrojë të drejtën e votës në mënyrë të pavarur dhe të fshehtë, transmeton lajmi.net.
Sipas njoftimit, në kabinën e votimit lejohet të qëndrojë vetëm një person, ndërsa votuesi duhet ta plotësojë fletëvotimin pa u penguar dhe në fshehtësi të plotë. Po ashtu, ndalohet votimi në emër të një personi tjetër.
KQZ thekson se votimi familjar përbën vepër penale dhe u bën thirrje qytetarëve që rastet e tilla t’i raportojnë në numrin e publikuar për këtë qëllim.
“Ligji për zgjedhjet nuk lejon votimin familjar”, thuhet në mesazhin e KQZ-së, e cila synon të garantojë integritetin e procesit zgjedhor dhe respektimin e të drejtës individuale të votës.
