Komisioni Qendror i Zgjedhjeve ka bërë të ditur se 22 parti politike dhe tri koalicione janë regjistruar për të marrë pjesë në zgjedhjet e parakohshme parlamentare që do të mbahen më 7 qershor.
Afati për deklarimin e pjesëmarrjes ose mospjesëmarrjes në zgjedhje, si dhe për regjistrimin e koalicioneve, ka përfunduar më 7 maj në mesnatë. Ky proces u ka vlejtur vetëm 53 partive politike të regjistruara aktualisht në Republikën e Kosovës.
Sipas njoftimit të KQZ-së, 22 parti kanë konfirmuar pjesëmarrjen në zgjedhje, ndërsa janë regjistruar edhe tri koalicione të përbëra nga nëntë parti politike. Po ashtu, nëntë parti kanë njoftuar se nuk do të marrin pjesë në procesin zgjedhor.
Në mesin e partive që kanë konfirmuar pjesëmarrjen janë Lidhja Demokratike e Kosovës, Aleanca për Ardhmërinë e Kosovës, Partia Demokratike e Kosovës, si dhe disa subjekte të komuniteteve joshumicë dhe parti të tjera më të vogla politike.
Koalicionet e paraqitura deri tani janë: Koalicija VAKAT, koalicioni “Ashkalitë e Bashkuar” dhe koalicioni i përbërë nga Lëvizja Vetëvendosje, Guxo, Alternativa dhe Partia Shqiptare Demokristiane, që do të garojë me emrin “Lëvizja VETËVENDOSJE!”.
Ndërkohë, në mesin e partive që kanë njoftuar mospjesëmarrjen janë Aleanca Kosova e Re, Nisma Socialdemokrate, Partia e Drejtësisë dhe disa subjekte të tjera politike.
Sipas KQZ-së, procesi i njoftimit për pjesëmarrje ose mospjesëmarrje dallon nga procesi i certifikimit të subjekteve të reja politike dhe dorëzimit të listave të kandidatëve për deputetë.
“Zëdhënësi i KQZ-së Valmir Elezi ka thënë se afati për aplikim për certifikim të subjekteve të reja politike (koalicionet, nismat qytetare dhe kandidatët e pavarur), ka filluar më 2 maj dhe do të përfundojë më 10 maj. Sipas Ligjit për Zgjedhjet e Përgjithshme, partia politike konsiderohet automatikisht e certifikuar, andaj ky proces do të vlejë vetëm për subjektet e reja politike, që në këtë rast janë koalicionet, nismat qytetare dhe kandidatët e pavarur.
Elezi ka njoftuar se dorëzimi i listës së kandidatëve për deputetë nga subjektet politike (partitë politike, koalicionet, nismat qytetare dhe kandidatët e pavarur) ka filluar më 2 maj dhe do të përfundojë më 12 maj 2026.”/teve1.info/
