Konfirmimi i tyre është bërë në mbledhjen e mbajtur nga KPK të martën.
Arben Ismajli, ish-prokuror në Prokurorinë Themelore në Gjilan, tashmë prokuror në Prokurorinë e Apelit; Armend Hamiti – prokuror në Prishtinë; Blerim Isufaj- Kryeprokuror në Prokurorinë Speciale, Kujtim Munishi – Kryeprokuror në Prishtinë si dhe Lulzim Sulejmani e Shqipdon Fazliu të dy prokurorë në zyrën e Kryeprokurorit të Shtetit,janë kandidatët në garë për ta zëvendësuar Aleksander Lumezin.
Në këtë mbledhje anëtarët e KPK-së kanë miratuar Planin strategjik dhe Planin e veprimit të sistemit prokurorial 2022-2024 dhe Planin e Punës së Këshillit Prokurorial të Kosovës për vitin 2022.
Ndërsa takimi ka vazhduar me miratimin e Rregullores për Zgjedhjen dhe Përfundimin e Mandatit të Drejtorit të Përgjithshëm të Sekretariatit të Këshillit Prokurorial të Kosovës dhe Drejtorit të Njësitit për Shqyrtimin e Performansës së Prokurorisë, njofton KPK, raporton teve1.info.
Në këtë takim është miratuar edhe Planit i personelit për vitin 2022.
KPK-ja ka mbajtur seanca dëgjimore për rastet disiplinore ndaj dy prokurorëve të Prokurorisë Themelore në Prishtinë dhe një prokurori të Prokurorisë Themelore në Prizren, kurse vendimet përkatëse do të bëhen publike siç parashihet me ligj.
Po ashtu, KPK-ja mori vendim për propozimin për lirim nga detyra të katër prokurorëve, që pritet të arrijnë moshën e pensionimit.
